Բ/2. ԿՐԹԱԿԱՆ ԵՒ ԳԻՏԱԿԱՆ ԿԱՌՈՅՑՆԵՐԷ
- Դպրոցասէր Տիկնանց Վարժարանէն
Ecole de Jeunes Filles Arméniennes
“Tébrotzassère”
Դպրոցասէր Տիկնանց Վարժարան LE RAINCY, le …..
(Enseignement Secondaire) 1, Boulevard du Nord
Téléphone: 927-01-72
Enregistré à Pontoise No. 1403
Թիւ 1591 Լը Ռենսի – Ֆրանսա, 7 Յուլիս 1962[i]
Ազնիւ պարոն Պէպօ Սիմոնեան,
Պէյրութ.
Ազնիւ պարոն,
Ստացանք պարոն Աշոտ Պատմագրեանի յոբելեանին նուիրուած հատորը զոր բարեհաճած էիք ղրկել մեր վարժարանի գրադարանին համար: Կը յայտնենք մեր սրտագին շնորհակալութիւնները այս գեղեցիկ նուէրին համար եւ կը խնդրենք ընդունիլ մեր լաւագոյն զգացումները:
Դպրոցասէր Տիկնանց [Ընկերութեան] Վարչութեան
ընդհ. քարտուղար
[ստոր.՝ Ա. Փիրփիրեան][ii]
[Դպրոցասէր Տիկնանց Ընկերութեան ֆրանսերէն եւ հայերէն հաւկթաձեւ կնիքը]
* * *
- Հայ Աւետարանական Գոլէճէն
ARMENIAN EVANGELICAL COLLEGE Հայ Աւետարանական Գոլէճ
- O. Box 3672 – Tel. 227516 Պէյրութ – Լիբանան
Beirut, Lebanon COLLÈGE ARMÉNIEN EVANGÉLIQUE
Beyrouth, Liban
Պէյրութ, 5 Մայիս 1968[iii]
Մեծայարգ տիար Պէպօ Սիմոնեան,
Տնօրէն Ռուբինեան Վարժարանի,
Աստ.
Յարգելի տիար,
Հայ Աւետարանական Գոլէճի Հայկական Ակումբի Վարչութիւնը կու գայ սոյն երկտողով Ձեզի յայտնել իր շնորհակալութեան ազնիւ զգացումները Ապրիլ 24-ի առթիւ իր կազմակերպած շարք մը դասախօսութեանց Ձեր մասնակցութիւնը բերելնուդ համար:
Յուսով ենք որ ուրիշ առիթներով դարձեալ հաճոյքը կ’ունենանք ունկնդրելու Ձեզ:
Յարգանքներով՝
Վարչութիւն Հայկական Ակումբի
Ատենապետ՝ Ատենադպիր՝
Սօսի Համալեան Հուրի Ղազարեան
* * *
ARMENIAN EVANGELICAL COLLEGE Հայ Աւետարանական Գոլէճ
- O. Box 3672 – Tel. 349816 Պէյրութ – Լիբանան
Beirut, Lebanon COLLÈGE ARMÉNIEN EVANGÉLIQUE
Beyrouth, Liban
[Պէյրութ,] 5 Փետրուար 1991[iv]
Մեծայարգ տիար Պէպօ Սիմոնեան,
Աստ.
Հայ Աւետ. Գոլէճի տնօրէնութիւնս ու Ատենամարզանքի Յանձնախումբը կը փափաքինք որ Ուրբաթ, 22 Փետրուար 1991-ի (ժամը կ. ե. 1:15-2:00) Երկրորդական բաժնի աշակերտութեան (թիւով 60) ատենամարզանքի պահուն հիւրը ըլլայիք իբր ծանօթ բանաստեղծ եւ արձակագիր:
Նախապէս այս հարցին մասին Ձեզի խօսած ու ձեր հաւանութիւնը առած էինք, ուստի պիտի խնդրէինք մեզի կանխաւ Ձեր ամփոփ կենսագրականը ղրկել, նաեւ ընտրել Ձեր գործերէն այն երկու հատուածները, որոնք կ’ուզէիք որ կարդացուէին այդ օր մեր աշակերտներուն կողմէ:
Կանխայայտ շնորհակալութեամբ՝
[ստոր.՝ ԶՄսըրլեան][v]
Զաւէն Մ. Մսըրլեան
Տնօրէն
[Հայ Աւետ. Գոլէճի քառալեզու կլոր կնիքը]
* * *
[Պէյրութ,] 28 Փետրուար 1991[vi]
Մեծայարգ տիար Պէպօ Սիմոնեան,
Աստ.
Սոյն պաշտօնագրով կու գանք մեր շնորհակալութիւնները յայտնելու որ սիրով ընդառաջեցիք մեր հրաւէրին եւ առիթ ընծայեցիք որ մեր աշակերտութիւնը ճանչնայ Ձեր անձն ու գրական աշխատանքները:
Ձեր ալ փափաքին ընդառաջելով, կը յայտնենք թէ մեր գրադարանէն ներս ունինք միայն «Ծուէն Ծուէն Երիզներ» գիրքը:
Գոհ պիտի ըլլայինք եթէ մեր չունեցածները տրամադրէիք դպրոցիս գրադարանին: Առ այդ՝ ընդունեցէ՛ք մեր կանխայայտ շնորհակալութիւնները:
[ստոր.՝ ԶՄսըրլեան]
Զաւէն Մ. Մսըրլեան
Տնօրէն
[Հայ Աւետ. Գոլէճի քառալեզու կլոր կնիքը]
* * *
ARMENIAN EVANGELICAL COLLEGE Հայ Աւետարանական Գոլէճ
- O. Box 3672 Պէյրութ – Լիբանան
Tel. 863592 COLLÈGE ARMÉNIEN EVANGÉLIQUE
Beirut, Lebanon Beyrouth, Liban
[Պէյրութ,] 17 Փետրուար 1995[vii]
Մեծայարգ տիար Պէպօ Սիմոնեան,
Աստ.
Շնորհակալութեամբ ստացանք Ձեր նորագոյն աշխատասիրութիւնը հանդիսացող «Մարդկային Իրաւանց Հարցեր» գիրքէն հինգ օրինակներ տարեվերջի մրցանակ յատկացնելու նպատակաւ, նաեւ օրինակ մը դպրոցի գրադարանին համար: Կը գնահատենք Ձեր ազնիւ ժեսթը:
Լաւագոյն մաղթանքներով՝
[ստոր.՝ ԶՄսըրլեան]
Զաւէն Մ. Մսըրլեան
Տնօրէն
[Հայ Աւետ. Գոլէճի քառալեզու կլոր կնիքը]
* * *
- Հայ Աւետարանական Կեդրոնական Բարձրագոյն Վարժարանէն
Հայ Աւետարանական Կեդրոնական Բարձրագոյն Վարժարան
Armenian Evangelical Central High School
[Պէյրութ,] 30 Հոկտեմբեր 1991[viii]
Մեծայարգ պրն. Պ. Սիմոնեան,
Տնօրէն Ազգ. Սահակեան-Լ. Մկրտիչեան Գոլէճի,
Պէյրութ, Լիբանան.
Յարգելի պաշտօնակից,
Հայ Աւետարանական Կեդրոնական Բարձրագոյն Վարժարանի տնօրէնութիւնն ու հոգաբարձութւիւնը կու գան իրենց շնորհակալութիւնները փոխանցելու Ձեզի, մեզի ղրկուած երկու՝ «Ծառին Ճիչը» եւ «Ուսանող» գիրքերուն համար:
Մեծապէս կը գնահատենք դժուարութիւններով լեցուն ամառուայ մը ընթացքին տարեգիրք հրատարակելու Ձեր արի կեցուածքը:
Մենք ուրախ եւ հպարտ պիտի զգանք այս թանկագին գործերը մեր գրադարանին մէջ զետեղելով, որպէսզի մեր աշակերտները առաւելագոյն չափով օգտուին անոնցմէ:
Վերամուտի առթիւ յաջողութեան լաւագոյն մաղթանքներով՝
[ստոր.՝ ՍՆաշեան]
Սոնա Պ. Նաշեան[ix]
Տնօրէն
[Հայ Աւետ. Կեդր. Բարձր. Վարժարանի եռալեզու հաւկթաձեւ կնիքը]
* * *
Պէյրութ, 9 Նոյեմբեր 1992[x]
Մեծայարգ պրն. Պ. Սիմոնեան,
Տնօրէն Հ. Կ. Բ. Մ.ի Սահակեան-Լ. Մկրտիչեան Գոլէճի.
Հայ Աւետ. Կեդրոնական Բարձր. Վարժարանի տնօրէնութիւնը կու գայ իր շնորհակալութիւնը փոխանցելու Ձեզի, Ձեր վարժարանին պարբերաթերթը եղող «Ուսանող» թերթէն օրինակ մը մեզի ղրկելնուդ համար:
Կը շնորհաւորենք Ձեր յարատեւութիւնը նման գործի մը Գ. հրատարակութեան առթիւ, որ յստակ կերպով կը ցոլացնէ վարժարանէն ներս կատարուած լուրջ աշխատանքները զանազան ճիւղերու մէջ:
Յաջողութեան լաւագոյն մաղթանքներով՝
[ստոր.՝ ՍՆաշեան]
Սոնա Պ. Նաշեան
Տնօրէն
[Հայ Աւետ. Կեդր. Բարձր. Վարժարանի եռալեզու հաւկթաձեւ կնիքը]
* * *
[Պէյրութ,] 24 Սեպտեմբեր 1993[xi]
Մեծայարգ տիար Պ. Սիմոնեան,
Տնօրէն Սահակեան եւ Լեւոն Մկրտիչեան Գոլէճի,
Հայ Աւետարանական Կեդրոնական Բարձր. Վարժարանի տնօրէնութիւնը կու գայ իր շնորհակալութիւնը փոխանցելու Ձեզի, Ձեր վարժարանի տարեգիրքին՝ «Ուսանող»ին համար, որ ազնուօրէն մեզի ղրկած էք:
Մեծապէս կը գնահատենք տարուած կրթական աշխատանքին առընթեր նման տարեգիրք մը հրատարակելու Ձեր անխոնջ ջանքերը:
Տէրը զօրացնէ Ձեզ նոր տարեշրջանի սեմին:
[ստոր.՝ ՍՆաշեան]
Սոնա Պ. Նաշեան
Տնօրէն
[Հայ Աւետ. Կեդր. Բարձր. Վարժարանի եռալեզու հաւկթաձեւ կնիքը]
* * *
[Պէյրութ,] 18 Փետրուար 1995[xii]
Մեծայարգ տիար Պէպօ Սիմոնեան,
Պէյրութ, Լիբանան.
Յարգելի գրագէտ,
Հայ Աւետարանական Կեդրոնական Բարձրագոյն Վարժարանի տնօրէնութիւնը կու գայ իր շնորհակալութիւնը փոխանցելու Ձեզի՝ Ձեր կողմէ մեզի ղրկուած «Մարդկային Իրաւանց Հարցեր» գիրքերուն համար:
Մեծապէս կը գնահատենք Ձեր շօշափած այժմէական այսքան կարեւոր մարդկացին իրաւանց հարցերը: Վստահ եմ՝ մեր աշակերտները շատ պիտի օգտուին այս ուսումնասիրութիւնները կարդալով:
Յարգանքներով՝
[ստոր.՝ ՍՆաշեան]
Սոնա Պ. Նաշեան
Տնօրէն
[Հայ Աւետ. Կեդր. Բարձր. Վարժարանի եռալեզու հաւկթաձեւ կնիքը]
* * *
- Հայ Կոյրերու եւ Խուլ-Համրերու Հաստատութենէն
Հաստատութիւն Հայ Կոյրերու եւ Խուլ-Համրերու
Պուրճ Համուտ
Լիբանան
[Պուրճ Համմուտ – Լիբանան,] 8 Մայիս 1967[xiii]
Մեծայարգ տիար Պէպօ Սիմոնեան,
Պէյրութ, Լիբանան.
Յարգելի տիար Սիմոնեան,
Այս նամակով կ’ուզեմ սրտանց շնորհակալութիւն յայտնել Ձեր բարեսիրական վեհոգի գաղափարին համար: Մեծապէս կը գնահատենք մեր գործին հանդէպ Ձեր ցուցուցած կարեկցական ոգին, որուն իբր ապացոյց ստացանք Ձեր օգնութիւնը՝ հինգ լ. ո.: Ասոր համար կը ներփակենք ստացագիր թիւ 8088 որ թիւով արձանագրած ենք մեր քով Ձեր նուէրը: Մեր պատսպարեալներն ալ մեզի հետ կը միացնեն իրենց երախտագիտական զգացումները եւ կը մաղթեն որ Աստուած ալ Ձեզ յիշէ ու Ձեր ամէն պէտքերը հոգայ Իր առատաբուխ գանձատունէն:
Մաղթելով ձեզի առողջութիւն, յաջողութիւն եւ երկար կեանք,
Մնամ անկեղծօրէն Ձերդ,
[ստոր.՝ Peter Braunschweig]
Բիթըր Պրաունշուայկ
Տնօրէն
*
* *
- Հայկազեան (Համալսարանական) Գոլէճէն
Հայկազեան Գոլէճ HAIGAZIAN COLLEGE
Մեքսիք փողոց Rue de Mexique
Պէյրութ, Լիբանան Beirut, Lebanon
- O. Box 1748 – Phone 236496
Cable Address: Hycol – Beirut
Պէյրութ, 7 Յունուար 1969[xiv]
Յարգելի պրն. Պէպօ Սիմոնեան,
Մեծապէս կը գնահատենք Ձեր հետաքրքրութիւնը Հայկազեան Գոլէճի հանդէպ, ինչպէս ցոյց կու տայ Ձեր – ուրիշներու կարգին – ստորագրած խնդրագիրը, որով կը փափաքիք Հայագիտական Ամբիոնը կամ գրադարանը մկրտուած տեսնել հանգուցեալ Վեր. Տիգրան Խրլոբեանի[xv] անունով: Ուրախ ենք ու երախտապարտ, որ Գոլէճի սահմաններէն դուրս ալ ճանաչում է գտած վերապատուելիին գործունէութիւնը, որ այսօր կը շարունակուի իր զաւակին՝ փրոֆ. Գէորգ Խրլոբեանի կողմէ:
Ինչպէս յուղարկաւորութեան ընթացքին յայտարարուեցաւ, Գոլէճի[ն] տնօրէնութիւնը այս ուղղութեամբ յստակ առաջարկներ ունէր: Այս առաջարկները քննուեցան եւ փոխանցուեցան Գոլէճի Ամերիկայի Խնամակալ Մարմինին, որուն կը պատկանի այս ուղղութեամբ վերջնական որոշում մը առնելու իրաւասութիւնը:
Խնամակալ Մարմինը այս շաբաթ իր հերթական ժողովին օրակարգի վրայ ունի նաեւ վերոյիշեալ հարցը: Արդիւնքը դրական ըլլալու պարագային, զայն պիտի պաշտօնապէս յայտարարենք Վեր. Տիգրան Խրլոբեանի յիշատակին նուիրուած հանդիսութիւններու ընթացքին, որոնք տեղի պիտի ունենան յառաջիկայ Ապրիլին:
Ձերդ անկեղծօրէն՝
[ստոր.՝ ԺՊիլեզիկեան]
Ժ. Պիլեզիկեան[xvi]
Նախագահ
* * *
Պէյրութ, 31 Յունուար 1969[xvii]
Պրն. Պէպօ Սիմոնեան, տնօրէն Ռուբինեան Վարժարանի,
Պէյրութ.
Յարգելի պրն. Սիմոնեան,
«Սփիւռքահայ Գրականութեան Շաբաթ»ը վերջ գտաւ՝ խանդավառութիւն եւ հետաքրքրութիւն ստեղծելով յատկապէս պէյրութահայ գրականասէր շրջանակներէ ներս: Ստեղծուած հետաքրքրութիւնն ու խանդավառութիւնը մենք կը պարտինք առաւելաբար զեկուցողներուն, որոնք երկարատեւ պրպտումներով, ուսումնասիրութիւններով պատրաստած էին յարգելի մակարդակի զեկուցումներ: Ուստի այս առիթով ընդունեցէ՛ք մեր ջերմագին շնորհակալութիւնը Ձեր գործօն[xviii] մասնակցութեան համար:
Ինչպէս ատենին յայտարարուած էր, «Սփիւռքահայ Գրականութեան Շաբաթ»ի զեկուցումները պիտի հրատարակուին առանձին գեղատիպ հատորով մը: Առ այդ կը խնդրենք Ձեզմէ, որ բարեհաճիք մինչեւ 10 Փետրուար 1969 մեր հասցէին ղրկել Ձեր զեկուցումին պատճէնը այն ձեւով որ Դուք կ’ուզէք զայն հրատարակուած տեսնել՝ ընելով անհրաժեշտ կրճատումներ ու յաւելումներ:
Ձերդ անկեղծօրէն՝
[ստոր.՝ ԺՊիլեզիկեան]
Ժ. Պիլեզիկեան
Նախագահ
* * *
Հայկազեան Համալսարանական Գոլէճ HAIGAZIAN UNIVERSITY COLLEGE
Պէյրութ, Լիբանան Beirut, Lebanon
March 18, 1996[xix]
Mr. & Mrs. Bebo Simonian,
AGBU Boghos K. Garmirian School,
Antelias
Beirut[xx]
Dear Friends,
I was pleasantly surprised to receive your three volumes which you had autographed.
Thank you for your feelings of appreciation and kindness. As I observe, your enthusiastic participation in all the activities of the Armenological Center, I am assured of your support and the value of our service to the Armenian Community.
I hope, with your help and dreams, we can improve in our service to our community. Thank you.
Sincerely,
[John Khanjian]
John Khanjian[xxi]
President
- O. Box 80-525-11-1748 Rue Jeitawy – Achrafieh Phone: (01) 442433 Fax: (01) 581240
* * *
- ՀՍՍՀ ԳԱ Արուեստի Հիմնարկէն եւ Հայկական Թատերական Ընկերութենէն
[Երեւան, Փետրուար 1984][xxii]
Յարգելի ընկեր Պ. Սիմոնեան,
ՀՍՍՀ ԳԱ արուեստի ինստիտուտը եւ Հայկական թատերական ընկերութիւնը հրաւիրում են Ձեզ արուեստագիտութեան դոկտոր, արուեստի վաստակաւոր գործիչ, ՀՍՍՀ պետական մրցանակի դափնեկիր
Գառնիկ Խաչատուրի Ստեփանեանի
ծննդեան 75-ամեակին նուիրուած մեծարման երեկոյին:
Երեկոն տեղի կ’ունենայ Դերասանի տանը (Կարմիր բանակի, 8) 1984 թ., Փետրուարի 20-ին, ժամը 19.30-ին:
ԾՐԱԳԻՐ
Բացման խօսք՝ Հր. Ղափլանեանի[xxiii]
Ելոյթներ
Գեղարուեստական բաժին:[xxiv]
* * *
- ՀՍՍՀ ԳԱ Մանուկ Աբեղեանի անուան Գրականութեան Հիմնարկէն եւ Սփիւռքահայութեան Հետ Մշակութային Կապի Կոմիտէէն
ՀԱՅԿԱԿԱՆ ՍՍՀ
ԳԻՏՈՒԹԻՒՆՆԵՐԻ ԱԿԱԴԵՄԻԱ
Մ․ ԱԲԵՂԵԱՆԻ ԱՆՈՒԱՆ
ԳՐԱԿԱՆՈՒԹԵԱՆ ԻՆՍՏԻՏՈՒՏ
375015, Երեւան
Կարմիր բանակի փողոց, թիւ 15
Հեռ․ 56-32-54
[Երեւան, 1989-ի գարուն] [xxv]
Մեծարգոյ տիար Պէպօ Սիմոնեան,
ՀՍՍՀ ԳԱ Մ. Աբեղեանի անուան Գրականութեան Ինստիտուտը եւ Սփիւռքահայութեան Հետ Մշակութային Կապի Կոմիտէն կը հրաւիրեն Ձեզ մասնակցելու սփիւռքահայ գրականութեան հարցերուն նուիրուած 2-րդ գիտական նստաշրջանին, որ տեղի կ’ունենայ 1989 թ. Մայիս 10-ին, 11-ին եւ 12-ին:
Սփիւռքահայութեան Հետ
Մշակութային Կապի Կոմիտէի նախագահ՝
[ստոր․՝ ԿԴալլաքեան]
Կ. Դալլաքեան
Մ. Աբեղեանի անուան Գրականութեան
Ինստիտուտի տնօրէն, ակադեմիկոս
[ստոր․՝ ԷՋրբաշ]
Էդ. Ջրբաշեան
* * *
- «Նարեկ» Ազգային Վարժարանէն (Նիկոսիա)
«Նարեկ» Ազգային Վարժարան ARMENIAN SCHOOL «NAREG»
Նիկոսիա NICOSIA
Հեռ. 22218 – Փոստարկղ 1730 Tel. 22218 – P. O. Box 1730
Նիկոսիա – Կիպրոս Nicosia – Cyprus
[Նիկոսիա,] 8 Յունիս 1979[xxvi]
Սիրելի եւ ազնիւ բարեկամս՝ Պէպօ Սիմոնեան,
Անցեալ Սեպտեմբերին Կիպրոս եւ ապա՝ վարժարանիս կատարած բարեբաստիկ եւ հաճելի այցելութեանդ ընթացքին վարժարանիս գրադարանը օժտեցիր գրական նորագոյն ստեղծագործութիւնդ եղող «Կանաչներու Առասպել»ով:
Եւ ահա, այսօր, կը ստանանք տեսքով բարակ, բայց բովանդակութեամբ հարուստ մէկ ուրիշ հեղինակութիւնդ՝ «Հեքիաթ Հայաստանի Մասին», Մանուկներու Միջազգային Տարուան առիթով իբրեւ ազնուագոյն նուէրդ մեր յոյսերուն թափ տուող մեր նորահաս սերունդի բոլոր անդամներուն:
Ուսուցչական կազմին եւ աշակերտութեան անունով կը փափաքիմ յայտնել գնահատանքի եւ երախտագիտութեան ջերմ զգացումներս այս ժեսթին ընդմէջէն ցոլացող քու անկեղծ հետաքրքրութեանդ եւ հոգածութեանդ համար, որոնք անկասկած մեզի կը ծառայեն իբրեւ խթան, խիստ պատասխանատու մեր աշխատանքը բազմապատկելու՝ հայապահպանման սրբազան առաքելութեան ուղիով նուիրական նպատակներու իրականացման ի խնդիր:
Նորանոր յաջողութեանց ջերմ մաղթանքներով,
եւ եղբայրական սիրով՝
[ստոր.՝ Վարդան][xxvii]
* * *
[Նիկոսիա,] 31 Հոկտեմբեր 1979[xxviii]
Սիրելի Պէպօ,
Այս առաւօտ ստացայ 21 Հոկտեմբեր թուակիր շրջաբերականդ «Հեքիաթ Հայաստանի Մասին»ի վերաբերեալ:
Հաճոյքով ու սիրով պիտի ուզէի օգնել այս գրքին տարածման Կիպրոսի մէջ:
Նկատի ունենալով որ անոր ընթերցումը հասկնալի պիտի ըլլայ առաւելաբար մեր վարժարանի բարձրագոյն երեք կարգերուն, պիտի խնդրէի որ առայժմ մեր ապսպրանքը 40 օրինակով ներկայանար:
Գիրքերու առաքումին հետ բարի եղիր հասկցնելու թէ ի՞նչ ձեւով պիտի նախընտրէիր որ կատարուէր 120 լիբ. ոսկիի վճարումը:
Կրկին անգամ մաղթելով լիակատար յաջողութիւն ազգանուէր աշխատաքներուդ, եւ
եղբայրական զգացումներով՝
[ստոր.՝ Վարդան] [Վարդան Թաշճեան]
* * *
[Նիկոսիա,] 30 Յունիս 1980[xxix]
Սիրելի Պէպօ,
Ատենին ստացայ 40 օրինակ «Հեքիաթ Հայաստանի Մասին» գրքոյկները ինչպէս նաեւ երկրորդ նամակդ, որով անոնց փոխարժէքը կը խնդրէիր որ 120 լ. ո.էն բարձրացնենք 160 լ. ո.ի, նկատի ունենալով փոխադրական աննախատեսելի ծախսեր:
Այս գիրքերու վաճառումը օրին սկսանք կատարել բայց անոնց լրիւ սպառումը մեր յուսացածէն աւելի դանդաղ ընթանալով, կարելի չեղաւ վճարումը ատենին կատարել: Յիշեցնեմ որ այս գիրքերը դպրոցին կողմէ ապսպրանք չըլլալուն՝ չէինք կրնար չէքով հատուցանել անոնց փոխարժէքը: Տարուան ընթացքին բազմաթիւ այլ գիրքեր եւս ստացանք հեղինակներու կողմէ՝ անհատական միջոցներով զանոնք ծախելու եւ կերպով մը քաջալեր հանդիսանալու հեղինակներու ազգօգուտ աշխատանքին: Բոլոր պարագաներուն ալ սպառումի գործը դանդաղելով, մեր մօտ մնացին օրինակներ, եւ ուրեմն ամբողջական գումարը կամքէ անկախ չկրցանք վճարել:
Կը ներես որ թերացայ այս լուսաբանութիւնը երկտողով մը քեզի յայտնելու եւ պատճառ դարձայ որ, կատակով ըսեմ՝ «թամբը առած ետեւէս վազես»…
Յառաջիկայ տարեշրջանի մեր դասագիրքերու ապսպրանքին հետ կապուած նամակովս, Վարուժան Ուրֆալեանէն (Ուրֆալեան Գրատուն, Նոր Մարաշ) խնդրեցի որ 160 լ. ո. քեզի վճարէ եւ հաշիւը միացնէ դասագիրքերու հաշիւին՝ քեզմէ ստացած ընկալագրով:
Այս կարգադրութիւնը յարմար տեսայ, ոչ թէ որովհետեւ նամակդ «տհաճ տպաւորութիւն» ձգեց վրաս, ինչպէս դուն կ’ենթադրես սխալմամբ, այլ որովհետեւ ես ինքս յանցաւոր կը զգամ որ իրապէս շատ ուշացուցի պարտքս. թէեւ, ինչպէս ըսի, պայմաններու բերումով:
Առ այդ ջերմ բարեւներ քեզի եւ ընտանիքիդ, ու դպրոցական տարեշրջանի աւարտին, սրտագին շնորհակալութիւններ քեզի եւ յարգարժան պաշտօնակիցներուդ: Վարձքերնիդ կատար:
Միշտ սիրով եւ անկեղծօրէն՝
[դժուար վերծանելի ստոր.՝ հաւանաբար Օհանեան]
* * *
- Նոր Բարձրագոյն Վարժարանէն
Նոր Բարձր. Վարժարան NEW HIGH SCHOOL
Նահր պողոտայ թիւ 456 Nahr Street No. 456
Հեռ. 241665 Tel. 241665
Համար 8/13 Beirut/Պէյրութ, 16 Օգոստ[ոս] 1964[xxx]
Մեծայարգ տիար Պէպօ Սիմոնեան,
Աստ.
Յարգելի պարոն,
17 Յունիս 1964 թուակիր նամակով պահանջած էի Ձեզմէ, որ տեղեկագրէք ինծի 1964-1965 տարեշրջանին վարժարանիս մէջ պաշտօնավարելու կամ պաշտօնավարութենէ հրաժարած նկատուելու Ձեր որոշումը: Դժբախտաբար, այս պաշտօնագիրը անպատասխան մնաց: Նոյն գրութեան վերջին տողերուն մէջ յայտնուած մտքին համաձայն, իրաւունք ունիմ եզրակացնելու թէ տրամադիր չէք շարունակելու:
Այսուհանդերձ, հակառակ այս զանցառութեան, 4 Օգոստ. 1964-ի մեր տեսակցութեան ընթացքին կայացած հասկացողութեան համաձայն, կը հրաւիրեմ Ձեզ որպէս հայերէնի այցելու ուսուցիչ պաշտօնավարելու վարժարանիս մէջ, 1964-1965 տարեշրջանին, վերցնելով 22 պահ, կէսօրէ առաջները միայն, ազատ մնալով ամէն կէսօրէ ետք:
Այս աշխատանքին փոխարէն պիտի ստանաք երեք հազար հարիւր քսան – 3120 – լիբ. ոսկի, այսինքն՝ ինչ որ Հ. Բ. Ը. Մ.ի Կրթական Յանձնախումբը կը յատկացնէր Ձեզի, 12 մասնավճարով:
Կը յուսամ Ձեր պատասխանը ստանալ մինչեւ 24 Օգոստոս 1964: Հակառակ պարագային, մերժուած կը նկատեմ սոյն հրաւէրը:
Նոր Բարձ. Վարժարանի տնօրէն
Նազարէթ Ղարիպեան
[Նոր Բարձրագոյն Վարժարանի եռալեզու հաւկթաձեւ կնիքը]
* * *
Համար 9/19 Beirut/Պէյրութ, 14 Սեպտ[եմբեր] 1965[xxxi]
Մեծայարգ տիար Պէպօ Սիմոնեան,
Աստ.
Յարգելի պարոն,
30 Օգոստոս 1965 թուակիր եւ 9/16 թուահամար հրաւիրագիրս անպատասխան մնաց, հակառակ նշանակուած պայմանաժամին: Կը լսեմ թէ հրաւիրուած էք Ազգ. Ռուբինեան Վարժարանի տնօրէնութեան պաշտօնին: Որքան ալ մեծ ցաւ պատճառէ ինծի Ձեզի պէս գիտակ ու կարող պաշտօնակիցէ մը զրկուելու պարագան, անհուն ուրախութիւն կը պատճառէ միեւնոյն ատեն որ պատասխանատուութեան ասպարէզ կը բացուի Ձեր առջեւ դրականօրէն արտաբերելու ձեր կարողութիւնները յօգուտ հայ նորահաս սերունդի դաստիարակման վսեմ գործին:
Այսուհանդերձ, կացութիւնը պէտք է յստականայ թէ՛ Ձեզի եւ թէ՛ ինծի համար հաւասարապէս մինչեւ 17 Սեպտ. 1965: Հակառակ պարագային ցաւով պիտի նկատեմ, թէ մերժած էք հրաւիրագիրը 1965-1966-ի պաշտօնավարութեան:
Նոր Բարձ. Վարժարանի տնօրէն
Նազարէթ Ղարիպեան
Արմէն Ղարիպ
[Նոր Բարձրագոյն Վարժարանի եռալեզու հաւկթաձեւ կնիքը]
* * *
Համար 9/24 Beirut/Պէյրութ, 18 Սեպտ[տեմբեր] 1965[xxxii]
Մեծայարգ տիար Պէպօ Սիմոնեան,
Աստ.
Յարգելի պաշտօնակից,
Ստացայ Ձեր 17 Սեպտ. 1965 թուակիր պատասխանը: Կը կրկնեմ թէ Ձեզի պէս գիտակից, նիւթին տիրապետող եւ նուիրեալ հա՛յ ուսուցչի մը պաշտօնակցութենէն զրկուիլս հեշտօրէն դարմանելի կորուստ մը չէ: Սակայն, Ազգ. Ռուբինեան Վարժարանին որպէս տնօրէն հրաւիրուիլը եւ այդ պատասխանատուութեան Ձեր կողմէ ընդունուիլը միակ մխիթարութիւնս է, որովհետեւ հաւատացող եմ թէ յիշեալ կրթարանին երկսեռ աշակերտութիւնը մեծապէս պիտի օգտուի Ձեր կարողութիւններէն եւ իրա՛ւ հայրենասէրի Ձեր զոհողութեան ոգիէն: Անկեղծօրէն յաջողութիւն կը մաղթեմ Ձեր նոր առաքելութեան համար, թելադրելով միանգամայն, որ վարչական պատասխանատուութեան ապերախտ մտահոգութիւններու մէջ չխեղդէք Ձեր գրական արժանիքն ու ճաշակը:
Հ. Բ. Ը. Մ.ի Կրթական Յանձնախումբէն ստացած 24 Օգոստոս 1965 թուակիր նամակը կը յայտնէր ինծի պաշտօնապէս ու Դուք վերստին կը հաստատուէիք Նոր Բարձ. Վարժարանէն ներս, ամսական 315 լ. ոսկիով: Այսօր իսկ տեղեակ պահեցի զանոնք Ձեր նոր պաշտօնի մանրամասնութիւնները: Պատրաստ եմ օգտակար հանդիսանալու Ձեզի, եթէ կարիքն զգաք համեստ փորձառութեանս:
Յարգանօք՝
Արմէն Ղարիպ
[Նոր Բարձրագոյն Վարժարանի եռալեզու հաւկթաձեւ կնիքը]
* * *
- Սահակեան Լիսէի Հոգաբարձութենէն
Հոգաբարձութիւն GÉRANCE
Հայ Ազգ. Սահակեան Բարձր. Վարժ.ի DE L’ÉCOLE NAT. ARM. SAHAGUIAN
Փ. Ա. 495 Պէյրութ – Լիբանան B. P. 495 Beyrouth – Liban
Nº 043 Պէյրութ, 19 Օգոստոս 1960[xxxiii]
Յարգելի տիար Պէպօ Սիմոնեան,
Աստ.
Ազնիւ պարոն,
Հոգաբարձութիւնս իր ատենին ստացաւ 18 Յուլիս 1960 թուակիր Ձեր նամակը եւ բովանդակութեան տեղեկացաւ:
Ձեր պահանջն է, Հ. Բ. Ը. Մ.ի որպէս ուսուցիչ Ձեզի սահմանուած թոշակէն զատ վարժարանիս կողմէ եւս յաւելեալ գումար մը տրամադրուի որպէսզի կարենաք «յառաջիկայ տարի Սանթր տ’Էթիւտ Սիւբէրիորի արուեստներու պատմութեան եւ ֆրանսական գրականութեան հետեւիլ», ինչպէս որ նախորդ տարիներ հետեւեցաք Սէն Ժոզեֆ Համալսարանի Արեւելեան Դպրութեանց Հայագիտական Կաճառին:
Հակառակ վարժարանիս ելեւմտական ոչ-բաղձալի կացութեան, մարմինս, քաջալերելու համար Ձեր ծրագիրը, որոշեց Ձեզի օժանդակել տարեկան 300 լիբ. ոսկի գումարով մը իր համեստ պիւտճէէն:
Առ այդ յաջողութեան մաղթանքներով,
ի դիմաց
Սահակեան Բարձր. Վարժ.ի Հոգ.՝
Ատենադպիր՝ Ատենապետ՝
[ստոր.՝ Փարամազ Կ. Տօնիկեան] [ստոր․՝ Ժամկոչեան]
[Հայ Ազգ. Սահակեան Բարձր. Վարժարանի հոգաբարձութեան հաւկթաձեւ կնիքը]
* * *
Հոգաբարձութիւն GÉRANCE
Սահակեան Լիսէի DU LYCÉE SAHAGUIAN
Հեռ. 234390 – 223971 Tél.: 234390 – 223971
Փ. Ա. 495 Պէյրութ – Լիբանան B. P. 495 Beyrouth – Liban
[Պէյրութ,] 8 Յուլիս 1966[xxxiv]
Մեծայարգ պարոն Պէպօ Սիմոնեան,
Յարգելի պարոն,
Հոգաբարձութիւնս կու գայ իր շնորհակալութիւնները յայտնել Ձեր 1965-1966 տարեշրջանի օգտաշատ պաշտօնավարութեան համար: Ուրախ պիտի ըլլայ եթէ պայմանները թոյլատու ըլլան, որ գալ տարի ալ վարժարանը իր ուսուցչական կազմին մէջ ապահովուած տեսնէ Ձեզ: Վստահ ենք թէ Ձեր տրամադրութիւններն ալ նոյնն են «Սահակեան»ի հանդէպ որը Ձերը նկատած էք հինէն ի վեր:
Կրկին շնորհակալութիւն եւ յաջողութիւն յաջորդ տարուան համար ալ:
Յարգանքներով,
ի դիմաց «Սահակեան»ի Հոգաբարձութեան՝
Ատենադպիր՝ Ատենապետ՝
[ստոր.՝ Տօնիկեան] [Փարամազ Կ. Տօնիկեան] [ստոր.՝ Ժամկոչեան]
[Սահակեան Լիսէի հոգաբարձութեան հաւկթաձեւ կնիքը]
* * *
- Սահակեան Լիսէի Տնօրէնութենէն
Տնօրէնութիւն DIRECTION
Սահակեան Լիսէի TÉL. 234390 DE LYCÉE SAHAGUIAN
Փ. Ա. 495 Պէյրութ – Լիբանան B. P. 495 Beyrouth – Liban
[Պէյրութ,] 12 Ապրիլ 1963[xxxv]
Յարգելի պ. Պէպօ Սիմոնեան,
Սահակեան Շրջանաւարտից Միութիւնը ծրագրած է տօնակատարել Սայաթ-Նովա-ի երկհարիւրյիսունամեակը 11 Մայիս 1963-ին, «Գալուստ Կիւլպէնկեան» սրահին[xxxvi] մէջ:
Այդ առթիւ կու գանք Ձեզ հրաւիրել որպէս բանախօս՝ նիւթ ունենալով Սայաթ Նովա բանաստեղծը: Միւս բանախօսը պիտի ըլլայ դպրոցիս բարեկամներէն պր. Մինաս Գանգրունի,[xxxvii] որուն հետ կրնաք տեսնուիլ, եթէ հարկ տեսնէք, նիւթի յստակացման համար:
Վստահ Ձեր պատրաստակամութեան, կը ներփակենք մեր շնորհակալութիւնները:
Յարգանքներով՝
Բ. Կ. Ժամկոչեան
[ստոր.՝ ԲԿԺամկոչեան]
* * *
[Պէյրութ,] 28 Ապրիլ 1972[xxxviii]
Մեծայարգ տիար Պէպօ Սիմոնեան,
Տնօրէն Ռուբինեան Վարժարանի,
Աստ.
Յարգելի բարեկամ,
Տէրը կամի 17 Մարտ 1972-ին տեղի պիտի ունենայ Ս. Շ. Մ.ի[xxxix] կազմակերպած յուշատօնը նուիրուած մեծ կորուսեալ Պարոյր Սեւակի առաջին տարելիցին:
Վարչութիւնը փափաքեցաւ որ Դուք ներկայացնէք Պարոյր Սեւակը:
Կը ներէք որ յիշեցնեմ՝ եթէ նիւթերու պէտք ունիք, ինչ որ չեմ հաւատար, կրնանք հայաստանեան թերթեր տրամադրել:
Յուսալով դրական պատասխան մը, կը ներփակեմ շնորհակալութիւններս:
Յարգ.
[ստոր.՝ ԲԿԺամկոչեան]
* * *
- Սուրբ Յակոբ Եկեղեցւոյ Շաբաթօրեայ Վարժարանէն – Մոնրէալ
ՍՈՒՐԲ ՅԱԿՈԲ ԵԿԵՂԵՑՒՈՅ ՇԱԲԱԹՕՐԵԱՅ ՎԱՐԺԱՐԱՆ
ÉGLISE ARMÉNIENNE APOSTOLIQUE SOURP HAGOP
ÉCOLE DE SAMEDI SATURDAY SCHOOL
3400 Rue Nadon, Montreal, Quebec, H4J 1P5 CANADA
Tel.: (514) 332-5935
1998-1999 ՏԱՐԵՇՐՋԱՆ
Թիւ 18/Ալ3 [Մոնրէալ,] 28 Նոյեմբեր 1998[xl]
Ազնուափայլ տիկին Ազատուհի Գալայճեան,
Պէյրութ – Լիբանան.
Ազնուափայլ տիկին,
Մեծ ուրախութեամբ իմացանք հրատարակութենէ մը, որ լոյս տեսած է կրթական մշակ պրն. Պէպօ Սիմոնեանի վերջին աշխատասիրութիւնը՝ «Հայակերտում եւ Մանկավարժութիւն» խորագրով:
Որպէս մոնթրէալաբնակ հայութեան հայապահպանման առաքելութեամբ նախանձախնդիր վարժարան, պիտի փափաքէինք որ 2 (երկու) օրինակ վերոյիշեալ հատորէն ղրկէիք մեզի, իսկ փոխարժէքը մեզի իմացնելով կ’ուղարկենք ամենակարճ միջոցին:
Մոնթրէալի մէջ Ս. Յակոբ Շաբաթօրեայ Վարժարանը միշտ հետաքրքրուած է նման շահեկան հրատարակութիւններով, որոնք հայ դպրոցի առաքելութեան վրայ փայլք մը եւս կու գան աւելցնելու:
Կանխայայտ շնորհակալութեամբ՝
[ստոր․՝ Հայկ Գազանճեան]
Հայկ Գազանճեան
Տնօրէն
* * *
- Վահան Թէքէեան Վարժարանի տնօրէնութենէն
Տնօրէնութիւն Direction of
Վահան Թէքէեան Վարժարանի Vahan Tekeyan School
Հեռ. 260574 – 581698 P. O. Box 80060, Bourj Hamoud
Պուրճ Համուտ (Լիբանան) Lebanon
Թիւ 23/44 Պէյրութ, 17 Մարտ 1995[xli]
Մեծայարգ տիար Պէպօ Սիմոնեան,
Աստ.
Շնորհակալութեամբ ստացանք Ձեր հեղինակութիւնը եղող «Մարդկային Իրաւանց Հարցեր» գիրքէն հինգ օրինակ, իբր մրցանակ նուէր տալու աշակերտութեան:
Օրին անձամբ ընթերցեցինք Ձեր գիրքը եւ զայն կը գտնենք խիստ օգտակար, յատկապէս անտեսուած՝ այլապէս հրատապ ազգային եւ համամարդկային հարցերը այդպէս գեղարուեստականօրէն եւ դիպուկ կերպով ներկայացնելնուդ համար: Բառացիօրէն եզական հրատարակութիւն մը, որ ի մի բերած է Ձեր տարիներու ընթացքին գրած անժամանցելի յօդուածները եւ մէկ կողքի տակ պահելով փրկած օրաթերթի յաճախ տնտեսուող ու մոռցուող սիւնակներուն մէջ թողլքուած մնալու ճակատագրէն:
Կը շնորհաւորենք Ձեզ սոյն հրատարակութեան առթիւ եւ կը մաղթենք առողջութիւն եւ յարատեւ կորով՝ յաջողապէս ի կատար ածելու Ձեր կրթական, գրական եւ ազգային-հասարակական գործունէութիւնները:
Յարգանօք՝
Վահան Թէքէեան Միջնակարգ Վարժարանի
Տնօրէն
[ստոր.՝ Ա.Իւրնէշլեան]
Արմէն Իւրնէշլեան[xlii]
[Վահան Թէքէեան Վարժարանի տնօրէնութեան հայերէն եւ արաբերէն կլոր կնիքը]
* * *
- Վիեննական Մխիթարեան Երկրորդական Վարժարանէն (Հազմիէ – Լիբանան)
Վիեննական Մխիթարեան COLLEGE MEKHITARISTE
Երկրորդական Վարժարան Hazmieh – Beyrouth (Liban) Tel. 281115
Հազմիէ – Պէյրութ[xliii]
Հազմիէ – Լիբանան, 9 Յունուար 1967[xliv]
Յարգելի պարոն Պէպօ Սիմոնեան,
Աստ.
Յարգելի պարոն,
Հազմիէի Վիեննական Մխիթարեան Երկրորդական Վարժարանիս հիմնարկութեան երեսնամեակը արժանավայել շուքով պիտի տօնուի առաջիկայ Մայիսին:
«Վերելք»ին[xlv] յաջորդ թիւը, բացառիկ բովանդակութեամբ, լոյս պիտի տեսնէ Ապրիլի վերջերը եւ ամբողջութեամբ նուիրուած պիտի ըլլայ սոյն յոբելեանին:
Նկատի ունենալով Ձեր հոգեկան կապերը Մխիթարեան Ազգանուէր Հաստատութեանս հետ, Ձեր ալ աշխատակցութիւնը կը խնդրենք անկեղծօրէն սոյն բացառիկին, թելադրելով որ գրութիւնները հասնին տնօրէնութեան Մարտ 5-էն առաջ:[xlvi]
Կանխայայտ շնորհակալութեամբ եւ սիրալիր ողջոյններով՝
[ստոր.՝ՀՍՍեքուլեան]
Հ. Օգոստինոս Սեքուլեան[xlvii]
Տնօրէն
[Մխիթարեան Վարժարանի արաբերէն, հայերէն եւ ֆրանսերէն կլոր կնիքը]
* * *
[i] Գրամեքենագրուած՝ Դպրոցասէր Տիկնանց Վարժարանի հայերէն եւ ֆրանսերէն վերտառութեամբ տպագիր ձեւաթուղթի վրայ։ Բնագիր։
[ii] Աղաւնի Փիրփիրեան (1910–1973) – Մեծ Եղեռնի որբուհիներէն: Իբրեւ որբուհի ուղեկցած է Դպրոցասէր Տիկնանց Վարժարանին՝ անոր Կոստանդնուպոլիսէն Սելանիկ, Մարսէյ եւ Ռենսի դեգերումներուն ընթացքին, այնուհետեւ ամբողջ կեանքը ծառայած է նոյն դպրոցին մէջ իբրեւ անոր ելեւմտական հարցերու պատասխանատու:
[iii] Ձեռագիր՝ Հայ Աւետարանական Գոլէճի քառալեզու վերտառութեամբ տպագիր ձեւաթուղթի վրայ։ Ինքնագիր։
[iv] Գրամեքենագրուած՝ Հայ Աւետարանական Գոլէճի քառալեզու վերտառութեամբ տպագիր ձեւաթուղթի վրայ։ Բնագիր։
[v] Զաւէն Մսըրլեան (ծնած է 1938-ին՝ Պէյրութ) – Կրթական գործիչ, պատմական գիտութիւններու դոկտոր, Հ․ Հ․ի Գիտութիւններու Ազգային Ակադեմիայի արտասահմանեան անդամ։ Աւարտած է Հայ Աւետարանական Գոլէճն ու Պէյրութի Ամերիկեան Համալսարանի Պատմագիտութեան Բաժանմունքը։ 1960-էն ուսուցչագործած է Հայ Աւետ․ Գոլէճին մէջ, զուգահեռաբար՝ ամբողջ կէս դար՝ 1967-2017 վարած է Գոլէճին տնօրէնութիւնը։ Մաս կազմած է «Շիրակ» եւ «Կամար» հանդէսներու խմբագրութեանց։ 20-րդ դարու հայոց պատմութեան, յատկապէս Հայկական Հարցի մասին արժէքաւոր բազմաթիւ գիրքերու հեղինակ է։
[vi] Գրամեքենագրուած՝ Հայ Աւետարանական Գոլէճի քառալեզու վերտառութեամբ տպագիր ձեւաթուղթի վրայ։ Բնագիր։
[vii] Գրամեքենագրուած՝ Հայ Աւետարանական Գոլէճի քառալեզու վերտառութեամբ տպագիր ձեւաթուղթի վրայ։ Բնագիր։
[viii] Գրամեքենագրուած՝ Հայ Աւետ. Կեդր. Բարձր. Վարժարանի արաբերէն, հայերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[ix] Սոնա Նաշեան (1925-2013) – Կրթական մշակ: Աւարտած է Հայ Աւետ․ Կեդր․ Բարձրագոյն Վարժարանը, ուր ծառայած է շուրջ կէս դար իբրեւ քարտուղարուհի, այցելու ուսուցչուհի, մնայուն ուսուցչուհի, 1988-1996-ին՝ տնօրէնուհի։ Այս ընթացքին ու 1996-ին հանգստեան կոչուելէ ետք մասնակցութիւն բերած է հայ աւետ․ համայնքի Լիբանանի տարբեր կառոյցներու գործունէութեանց։
[x] Գրամեքենագրուած՝ Հայ Աւետ. Կեդր. Բարձր. Վարժարանի արաբերէն, հայերէն եւ անգլերէն տպագիր պաշտօնական նոր ձեւաթուղթի վրայ, ուր վերը, ձախին, ԿԲՎ տառերը տպագրուած են 70 թուանշանին վրայ, իսկ տակը տպուած է 1922-1992: Ձեւաթուղթի ձախ լուսանցքին, լայնութեամբ քանի մը տողի վրայ տպուած է. Ով Տէր, Դուն մեզի ապաւէն եղար ազգէ մինչեւ ազգ – Սաղմ. 90.1։ Բնագիր։
[xi] Գրամեքենագրուած՝ Հայ Աւետ. Կեդր. Բարձր. Վարժարանի արաբերէն, հայերէն եւ անգլերէն վերտառութեամբ տպագիր պաշտօնական նոր ձեւաթուղթի վրայ։ Բնագիր։
[xii] Գրամեքենագրուած՝ Հայ Աւետ. Կեդր. Բարձր. Վարժարանի արաբերէն, հայերէն եւ անգլերէն տպագիր պաշտօնական եւս մէկ նոր ձեւաթուղթի վրայ, ուր վերը, ձախին, ուղղանկիւնի մը մէջ տպագրուած են ԿԲՎ տառերը, որոնց վարը, աջին, պատկերուած է բացուած գիրք մը: Ուղղանկիւնին տակը տպուած է դպրոցի պետական հրամանագիրին թիւը՝ 1021/1965։ Բնագիր։
[xiii] Գրամեքենագրուած՝ Հայ Կոյրերու եւ Խուլ-Համրերու Հաստատութեան հայերէն, ֆրանսերէն եւ արաբերէն վերտառութեամբ տպագիր ձեւաթուղթի վրայ։ Զանց ըրած ենք վերջին երկու լեզուներով վերտառութիւնը։ Բնագիր։
[xiv] Գրամեքենագրուած՝ Հայկազեան Գոլէճի հայերէն, արաբերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xv] Վեր. Տիգրան Խրլոբեան (1891-1968) – Կրօնական եւ կրթական գործիչ։ Աւարտած է Կեդրոնական Թուրքիոյ Գոլէճը, հետագային ուսանած Աթէնքի Աստուածաբանական Ուսմանց Ճեմարանին մէջ։ 1939-ին ձեռնադրուած է աւետարանական հովիւ։ Ծառայած է Գարատուրանի, Գրըգ Խանի, Հալէպի եւ Պէյրութի մէջ։ Մեծ ներդրում ունեցած է Պէյրութի Հայկազեան Գոլէճի հիմնադրման մէջ 1955-ին։ Հիմնադիր-վարիչ Գոլէճի Հայագիտութեան Ամպիոնին եւ գրադարանին, հիմնադիր խմբագիր «Նոր Աւետաբեր» թերթի, 1964-1966-ին՝ Հայ Աւետ․ Գոլէճի տնօրէն։
[xvi] Ժիլպեր Պիլեզիկեան (ծնած է 1927-ին՝ Փարիզ) – Աստուածաբանութեան դոկտոր, աւետարանական հովիւ, համալսարանական դասախօս։ Հայկազեան Գոլէճի նախագահը 1967-1971-ին։ 1960-ականներէն գործած է Ա․ Մ․ Ն․ի մէջ։
[xvii] Գրամեքենագրուած՝ Հայկազեան Գոլէճի հայերէն, արաբերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xviii] Ճիշդ բառն է՝ «գործուն»։
[xix] Համակարգչային շարուածք՝ Հայկազեան Համալսարանական Գոլէճի հայերէն անգլերէն եւ արաբերէն վերտառութեամբ տպագիր ձեւաթուղթի վրայ: Ձեւաթուղթին վերը, մէջտեղը, պատկերուած է Հ․ Հ․ Գ․ի տարբերանշան-վահանը։
[xx] Նամակագիրը շփոթած է Լիբանանը Պէյրութի հետ:
[xxi] Վեր․ Ժան Խանճեան (ծնած է 1932-ին՝ Հալէպ) – Կրօնական եւ համալսարանական գործիչ, աստուածաբանութեան դոկտոր։ Աւարտած է Ալեփփօ Գոլէճը, Պէյրութի Մերձաւոր Արեւելքի Աստուածաբանութեան Դպրոցը, Պէյրութի Ամերիկեան եւ Քլերմոնի համալսարանները։ Այնուհետ ծառայած է Սուրիոյ տարբեր վայրերու հայ աւետ․ եկեղեցիներու, նաեւ Ա․ Մ․ Ն․ի բարձրագոյն կրթական հաստատութիւններու մէջ։ 1995-2002-ին եղած է Հայկազեան Hամալսարանին նախագահը։ Վերադառնալով Ա․ Մ․ Ն․, շարունակած է համալսարանական գործունէութիւնը մինչեւ հանգստեան կոչուիլը 2017-ին։
[xxii] Գառնիկ Ստեփանեանի լուսանկարով տպագիր բացիկ-հրաւիրատոմս, նկարի աջին՝ դափնիի ճիւղի վրայ՝ 75 թուանշանով։ Բնագիր։
[xxiii] Հրաչեայ Ղափլանեան (1923-1988) – Անուանի դերասանապետ եւ բեմադրիչ։ Երեւանի Տրամաթիքական Թատրոնի հիմնադիր (հետագային կոչուած է իր անունով):
[xxiv] Հրաւիրագիրի աջին տպուած է հայերէն գրութեան ռուսերէն թարգմանութիւնը:
[xxv] Գրամեքենագրուած՝ ՀՍՍՀ Գիտութիւններու Ակադեմիայի Մ․ Աբեղեանի անուան Գրականութեան Հիմնարկի հայերէն եւ ռուսերէն վերտառութեամբ տպագիր ձեւաթուղթի վրայ։ Երկու լեզուներով վերտառութեանց միջեւ տպուած է ՀՍՍՀ-ի զինանշանը։ Բնագիր։
[xxvi] Գրամեքենագրուած՝ «Նարեկ» Ազգային Վարժարանի հայերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xxvii] Վարդան Թաշճեան (ծնած է 1942-ին՝ Պուրճ Համմուտ) – Կրթական գործիչ, գեղանկարիչ։ Աւարտած է Մելգոնեան Կրթական Հաստատութիւնը եւ Պէյրութի Ամերիկեան Համալսարանը։ Ուսուցչագործած է Արմէն Ղարիպի Նոր Բարձրագոյն Վարժարանին եւ Մ․ Կ․ Հ․ի մէջ։ 1975-2001-ին եղած է ընդհանուր տնօրէնը Կիպրոսի «Նարեկ» ազգային վարժարաններու ցանցին (Նիկոսիա, Լառնաքա, Լիմասոլ)։
[xxviii] Գրամեքենագրուած՝ «Նարեկ» Ազգային Վարժարանի հայերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xxix] Գրամեքենագրուած՝ «Նարեկ» Ազգային Վարժարանի հայերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xxx] Ձեռագիր՝ Նոր Բարձրագոյն Վարժարանի արաբերէն, հայերէն եւ անգլերէն վերտառութեամբ տպագիր ձեւաթուղթի վրայ։ Ինքնագիր։
[xxxi] Ձեռագիր՝ Նոր Բարձրագոյն Վարժարանի արաբերէն, հայերէն եւ անգլերէն վերտառութեամբ տպագիր ձեւաթուղթի վրայ։ Ինքնագիր։
[xxxii] Ձեռագիր՝ Նոր Բարձրագոյն Վարժարանի արաբերէն, հայերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xxxiii] Ձեռագիր՝ Հայ Ազգ. Սահակեան Բարձր. Վարժարանի հոգաբարձութեան արաբերէն, հայերէն եւ ֆրանսերէն վերտառութեամբ տպագիր ձեւաթուղթի վրայ։ Ինքնագիր։
[xxxiv] Գրամեքենագրուած՝ Սահակեան Լիսէի հոգաբարձութեան արաբերէն, հայերէն եւ ֆրանսերէն վերտառութեամբ տպագիր նոր ձեւաթուղթի վրայ։ Բնագիր։
[xxxv] Գրամեքենագրուած՝ Սահակեան Լիսէի տնօրէնութեան արաբերէն, հայերէն եւ ֆրանսերէն վերտառութեամբ տպագիր ձեւաթուղթի վրայ։ Բնագիր։
[xxxvi] Հ․ Բ․ Ը․ Մ․ի «Գալուստ Կիւլպէնկեան» հանդիսասրահը կը գտնուէր Պէյրութի կեդրոնը՝ միութեան Յովակիմեան-Մանուկեան Մանչերու Երկրորդական Վարժարանի նոյն բակին մէջ։
[xxxvii] Մինաս Գանգրունի (Մինաս Գըրըշըքեան, 1929-2009) – Լիբանանահայ երգահան, խմբավար, մանկավարժ: Հնչակեան գործիչ Հրանդ Գանգրունիի եղբայրն է։ Յաճախած է Ազգ․ Սահակեան, Հայ Կաթողիկէ Մեսրոպեան եւ Հազմիէի Վիեննական Մխիթարեան վարժարաններ, ապա հետեւած Լիբանանի Ազգային Երաժշտանոցի Երաժշտագիտութեան Բաժանմունքի եւ Երաժշտութեան Տեսութեան եւ Յօրինումի Բաժինի դասընթացքներուն։ Ուսուցչագործած է Լիբանանի արաբական եւ հայկական, առաւելաբար Հ․ Բ․ Ը․ Մ․ի վարժարաններուն մէջ։ Հեղինակած է «Երաժշտագիտական Բացատրական Բառարան»ը (տպարան «Զարթօնք», Պէյրութ, 1987, 400 էջ): Երաժշտութեան առնչուած յօդուածներով աշխատակցած է հայկական մամուլին։
[xxxviii] Ձեռագիր՝ Սահակեան Լիսէի տնօրէնութեան արաբերէն, հայերէն եւ ֆրանսերէն վերտառութեամբ տպագիր ձեւաթուղթի վրայ։ Ինքնագիր։
[xxxix] Ս․ Շ․ Մ․ – Սահակեան Շրջանաւարտից Միութիւն։
[xl] Համակարգչային շարուածք՝ Սուրբ Յակոբ Եկեղեցւոյ Շաբաթօրեայ Վարժարանի հայերէն եւ ֆրանսերէն վերտառութեամբ տպագիր ձեւաթուղթի վրայ։ Բնագիր։
[xli] Գրամեքենագրուած՝ Վահան Թէքէեան Վարժարանի հայերէն, արաբերէն եւ անգլերէն վերտառութեամբ տպագիր ձեւաթուղթի վրայ։ Բնագիր։
[xlii] Արմէն Իւրնէշլեան (ծնած է 1967-ին՝ Պէյրութ) – Կրթական գործիչ, բանասիրական գիտութիւններու թեկնածու։ Աւարտած է Մելգոնեան Կրթական Հաստատութիւնը եւ Երեւանի Պետական Համալսարանի Բանասիրութեան Բաժանմունքը։ Հայոց լեզուի եւ գրականութեան ուսուցիչ եղած է ու կը շարունակէ դասաւանդել Լիբանանի հայկական վարժարաններու եւ Հայկազեան Համալսարանին մէջ։ 1992-1996-ին՝ Պէյրութի Վահան Թէքէեան Վարժարանի, 2017-ի աշունէն առ այսօր Պէյրութի Հայ Աւետարանական Գոլէճի տնօրէն։
[xliii] Հազմիէն Պէյրութի վարչական շրջանին մէջ չի գտնուիր։ Ան Պէյրութի արեւելեան արուարձաններէն է եւ մաս կը կազմէ Լեռնալիբանանի նահանգի Մեթնի գաւառին:
[xliv] Գրամեքենագրուած՝ Մխիթարեան Երկրորդական Վարժարանի հայերէն, ֆրանսերէն եւ արաբերէն վերտառութեամբ տպագիր ձեւաթուղթի վրայ։ Բնագիր։
[xlv] «Վերելք» – [«Ուսանողական պարբերագիրք»։ «Հրատարակութիւն Պէյրութի Վիեննական Մխիթարեան Երկրորդական Վարժարանի Ուսանողական Խորհուրդին»։ Լոյս տեսած է 1961-1974 թուականներուն՝ ուսուցիչ Յովսէփ Մելքոնեանի խմբագրութեամբ։
[xlvi] «Վերելք»ի Է․ տարի, թիւ 2 (13), Մայիս 1967 նշումներով «բացառիկ թիւ»ին մէջ կան գրութիւններ լիբանանահայ բազմաթիւ մտաւորականներէ, սակայն կը բացակայի Պէպօ Սիմոնեանի ստորագրութեամբ որեւէ հրապարակում։
[xlvii] Հ. Օգոստինոս Սեքուլեան (1921-2014) – Բնիկ հունգարահայ։ Վիեննայի Մխիթարեան միաբանութեան անդամ։ 1977-1983-ին եւ 1988-1993-ին վարած է «Հանդէս Ամսօրեայ»ի խմբագրութիւնը։ Եղած է հունգարահայոց հոգեւոր հովիւը, Վիեննայի վանքի մատենադարանի եւ թանգարանի վարիչ, պատրաստած է մատենադարանի հայերէն ձեռագիրներու եւ «Հանդէս Ամսօրեայ»ի մէկ դարու մատենագիտական ցանկերը։ 1959-էն վարած է Հազմիէի Մխիթարեան Վարժարանի, 1984-2009-ին՝ միաբանութեան Լա Քրեսենթայի (Մեծ Լոս Անճելոս) Մխիթարեան Վարժարանի տնօրէնութիւնը։